هذه المرة نحكي لكم قصة
!!! متولي المستحيل !!!
ذهب متولي ذات مرة ليقوم بعمل جليل
فقد قرر أن يكشف مؤامرات الصهاينة الخبثاء
فتنكر في شكل رئيس الوزراء الإسرائيلي
"أولمرت"
يعني لبس الوش بتاعه وغير صوته عشان يبقى زييه
حتى شوفوا شكله بعد ما اتنكر
ثم ذهب ليجتمع بكبار الصهاينة في "بار" مصمم على شكل "الكعبة" من أجل الإساءة للإسلام
فدار هذا الحوار
صهيوني: أهلا أهلا أولمرت، فينك يا راااجل يا صهيوني يا كبير؟
متولي: اديني جيت اهه عشان اتطمن عليكم، وعلى آخر أخبار المؤامرات ضد الإسلام
صهيوني: تعالى بقى، بص شوف الصهاينة بيعملوا ايه
أولا عملنا جزمة جديدة ماركة "تيتي"ـ
متولي: تيتي؟؟؟
صهيوني: ايوة، "تيتي" دي لما تجيب مرايا وتقراها من الشمال لليمين تبقى "يتيت" ودي كلمة هندوسية فيها إساءة للمسلمين
هنا بدأ متولي يشعر بالخوف، وبدأ العرق يتصبب من فرط الرمان ... أقصد من فرط المفاجأة
متولي: طب.. طب وايه كمان؟
صهيوني: مش كده وبس، ده احنا عملنا النعل بتاع الجزمة من خلاصة زيت كبد الخنزير
فبدأ متولي يرتعد
متولي: يا اولاد الصهاينة.. وايه كمان؟
صهيوني: انت لسه شفت حاجة، لا ده احنا كتبنا من تحت النعل اسم "متولي هاينزمان" عشان الواحد يدوس على اسمه طول ماهو رايح وطول ماهو جاى، متولي ده اللى مسهرنا الليل ومورينا الويل
فاستشاط متولي غضبا واحمر وجهه
صهيوني: مالك يا أولمرت زعلانة ليه؟
متولي: عروستي ضاعت بأ... قصدي.. اه.. انا.. انا متضايق ومخنوق من متولي ده زيكم، ايوة فعلا متضايق منه
طيب اسيبكم انا بقى عشان ورايا مشاوير مهمة
وخرج متولي
ثم بدأ يركض
ويركض
وخلع القناع
وبدا عليه الغضب
وارتسمت حواجبه في شكل مرعب
وكشر عن أنيابه
وعزم على . . . الانتقام
عايز تعرف قصدنا إيه؟
اتفضل هنا
Wednesday, March 19, 2008
المؤامرة
فهرس المواضيع
|
متولي والعربية  متولي: المهم انا عايز كمان أبقى أحط لي كام سي دي على برابريز العربية، وحبة مرايات صغيرة من اللي مش بتشوف فيها حاجة دي مصدق: وأهم حاجة الكلب اللي راسه بتلعب ده متولي: آه، وعايز كمان أكتب على العربية "الأمير ميتو" أو "البرنز ميتو"، وأكتب كمان "مافيش صاحب يتصاحب" مصدق: قصدك ايه يامتولي بـ"مافيش صاحب يتصاحب" دي؟ متولي: لا لا ما تفهمنيش غلط ياحاج، كله كوم وانت كوم تاني مصدق: ربنا يخليك يا أمير .. قصدي يا برنز متولي: وعايز كمان أحط صورة الواد اللي (لا مؤاخذة) بيتبول ده اقرأ المزيد |
متولي سايق عربيته  ابتدى عم مصدق يقول لمتولي: على فكرة يا داكتور، من أهم قواعد السواقة هنا إنك تسيب بينك وبين العربية اللي قدامك 5 سنتيمتر بس، ولا أكتر ولا أقل متولي: اشمعنى 5 سنتيمتر بس يعني مصدق: سألتني اشمعنى، أقول لك أنا بقى، عشان لو سبت أكتر من كده، الناس اللي جنبك عدم اللامؤاخذة هيستهفأوك، وفجأة تلاقي واحد منهم قام كاسر عليك ودخل بوز عربيته بينك وبين اللي قدامك، ساعتها بقى يا حلو يبقى حطك أمام الأمر الواقع، ولازم هتسيبه يعدي، خلي بالك الناس بقيت وحشة أوي وهي سايقة يا دكتور، انت عارف ده في مرة ... اقرأ المزيد |
|
صلاة الجمعة  وفجأة لقى متولي الناس رافعة ايديها وبتقول: آمين فاضطر إنه يؤجل نقاشه مع مصدق، وراح رافع ايديه الاتنين فوووق اوي وقعد يقول: آآآمين، آآآمين بعد ما الخطيب خلص دعاء، مسح متولي وشه وبعدين قعد يبوس ايده اليمين، وش وظهر، وقعد يبوس ايده الشمال عشان ما تزعلش، وش وظهر برضه، وقعد يبوس صوابعه كمان، صباع صباع الظاهر إنه كده عمال بيشكر ربنا زي ما هو متخيل اقرأ المزيد |
المنتديات العربية  ودي كانت ردود الناس على الموضوع اللي فتحه متولي: - يسلموووووووووووووو - تقبل مني باقة الورود - تقبل مروري بعد غروري، فالموضوع مش ضروري - شو؟؟ هادي اول مرة عم تحكي ها الحكي، شلون شلمبوح هيك مشكور خيي - لازم لازم ننشره بلا تردد وبلا خوف وبلا تأخر وبلا وعي - modo3 gamed gddan y 3ashk el eftkaaaaaaaas, yaryt mat7rmnash mn moady3k el qayyema اقرأ المزيد |
|
اتصال هاتفي الجزء الأول - الجزء الثاني - الجزء الثالث  متولي: ده جني ابن جنية أنا أعرف أطفشه ازاي إفتكاسات: ازاي؟ متولي: شوفي، هاتي كوباية مية ساقعة، وقربيها من بقِك وغني أنشودة "ذهب الليل" أو "ماما زمانها جاية" أو حتى أنشودة "يابا يابا يابا"، وبعد كده حطي ايدك في المية ورشي بايدك في كل ركن في البيت بالمية دي إفتكاسات: طب ينفع استخدم بخاخة؟ متولي: احنا هنهرج؟ اسمعي الكلام من غير نقاش، عشان انتي مش عارفة شغل العفاريت ده عامل ازاي، وبعدين بعد ما تخلصي الكوباية اطفي النور عليكي واقعدي جنب الباب واقري سورة الجن 700 مرة، وسورة الفلق 700 مرة، وسورة الناس 609 مرة اقرأ المزيد الجزء الأول - الجزء الثاني - الجزء الثالث |
قشور البطاطس  جلس متولي وسط جمع من الناس ليلقى محاضرة دينية وبدأ الحديث متولي: السلام عليكم، النهاردة يا جماعة هنتكلم إن شاء الله عن وصف الجنة فقال أحد الحضور: جنة إيه يا شيخ؟ احنا مش عايزين الدلع ده، احنا عايزين حاجة تسخنا كده وتربينا وتخلينا ما نرجعش للذنوب تاني متولي: طيب بلاش، خلوني اكلمكم عن عذاب القبر فقال آخر: عذاب ايه وقبر ايه يا شيخ؟ ليه تنفروا الناس، الدين يسر وربنا غفور رحيم اقرأ المزيد |
|
أحاديث موضوعة الجزء الأول - الجزء الثاني  يقول متولي: أعزائي "الفورووردجية" (جاية من forward يعني)، أنا عارف انكم مش بتقروا الرسايل اللي بتنشروها دي، ولو قريتوها مش بتفكروا فيها، ولو فكرتوا فيها مش بتفهموها، بس مش مهم مش مهم، المهم ننشر نؤجر النهاردة انا جمعت لكم باقة من أحلى الايميلات المؤثرة The Greatest Hits ماحدش بقى يسألني هل اتأكدت من صحة الأحاديث ولا لا، مش مهم مش مهم، المهم إنها أحاديث مؤثرة موت موت موت اقرأ المزيد الجزء الأول - الجزء الثاني |
مقاطعة موزمبيق  يقول متولي: بأدعوكم لمقاطعة البضائع الموزمبيقية، هي صحيح حكومة موزمبيق قدمت اعتذار رسمي، بس ولو، على مين، ده احنا العرب لازم لازم نقاطع البضائع الموزمبيقية، مش كده وبس، الراجل ده أمه من أصل مكسيكي، فلازم لازم نقاطع البضائع المكسيكية وفيما يلي قائمة بهذه البضائع المحظورة موزمبيكيو تشيكن، مكرونة باكالاولاو، أسمنت المكسيكيين المتحدين، طعام القطط مكسك بسبس اقرأ المزيد |
|
المؤامرة هذه المرة نحكي لكم قصة !!! متولي المستحيل !!! ذهب متولي ذات مرة ليقوم بعمل جليل فقد قرر أن يكشف مؤامرات الصهاينة الخبثاء فتنكر في شكل رئيس الوزراء الإسرائيلي "أولمرت" يعني لبس الوش بتاعه وغير صوته عشان يبقى زييه اقرأ المزيد |
الانتقام  لما تلاقي السؤال: "هل تتفق مع الراجل الملحد؟؟؟"ـ قل له "لا"، ابلع الكابسولة . . . عفوا، أقصد أنقر على الكابسولة الحمرا حتى لو لاقيت كلام بلغة غريبة فمش مهم المهم تـ كليك على الزرار الأحمر اقرأ المزيد |
|
أراهنك قال الملحد (فزعا): ايه ده!!! مش ممكن، انت أسلمت، ومؤمن بالله؟ طب تراهني على إني أقدر أجمع أسماء ملحدين أصحابي، أكتر من المؤمنين بالله من أصحابك؟ متولى: أراهنك، هو صحيح الرهان حرام عندنا، بس مافيش مانع في سبيل خدمة البشرية الملحد: تراهني إني أقدر أجيب 300 اسم؟ متولي: أراهنك اقرأ المزيد |
البالتوك  المهم ان متولي راح للبوب الكبير بتاع بالتوك ودار بينهم الحوار ده متولي: ايه موضوع الحجرة اللي بيشتموني فيها دي بوب البالتوك: يعني هي جت على دي؟ مافيه عندنا غرف كتييييييييير فيها إساءة للإسلام والمسلمين، انت جاى تفوق دلوقتى؟ متولي بعنف وعينيه حمرة (من كتر السهر على الفوروورد): بص يابوب، يا اما تقفلوا أم الحجرة والصالة اللي انتوا سايبينها مفتوحة دي ...يا اما اقرأ المزيد |
من هو متولي هاينزمان؟؟؟
السلام عليكم
ملحوظة هامة جدا: هذه القصة غير واقعية، إنما الهدف منها السخرية من الجهل
أكرر: هذه القصة غير واقعية
أكرر عشان فيه ناس لا مؤاخذة بتتظاهر إنها تحت خط الذكاء: هذه القصة غير واقعية
ده نموذج (غير حقيقي ومبالغ فيه) للرسايل العقيمة اللى المسلمين بيتداولها دلوقتى
كان ياما كان
كان فيه راجل ملحد معادي للإسلام اسمه
" هاينزمان "
راح الراجل ده في مرة عشان يناظر أحد علماء المسلمين في القرن الثاني الهجري
ولما قابل فعلا أحد العلماء قال له بخبث ودهاء: تعالى بقى يا شيخ لما أغلبك في مناظرة
تقدر تقول لي لما رقم اتنين قبله رقم واحد، يبقى رقم واحد قبله رقم كام؟؟؟
قال له الشيخ بكل ثقة: صفر
اندهش الملحد من ذكاء وعبقرية الشيخ
وقال: كيف لرجل في القرن الثاني الهجري أن يعرف هذه المعلومات
أشهد أن لا إله إلا الله
ورمى طاقية اليهود اللي كان لابسها على الارض، مع انه ملحد
ونزل على الأرض ليقبل تراب مصر عشان بلد الأزهر الشريف
والناس لما شافوه السنة اللي بعدها بيحج قالوا له: مش انت الراجل اليهودى الملحد (مش عارف ازاى) اللي كنت بتحارب الاسلام طول عمرك؟
قال لهم: أنا أسلمت وغيرت اسمي لـ
" متولي هاينزمان "
وبعدها اترقى لحد ما بقى الرجل الاول والاوحد في وكالة ناسا لعلوم الفضاء
واتعمل له تمثال في ميدان العباسية نظرا لدفاعه المستميت عن الاسلام
لكن الانجليز لما دخلوا مصر قالوا: مش ده هاينزمان الرجل اليهودي الملحد اللى اسلم
ومن ساعت ما اسلم وهو مسهرنا الليل وعامل لنا رعب وقلق بدفاعه المستميت عن الاسلام
فلما جم يكسروا التمثال ... سبحان الله ... لقوا ايد التمثال اترفعت
والتمثال بيقول لهم، انا الجنى حارس التمثال
...امشوا من هنا يا اولاد الـ
ومن ساعتها والناس بتروح ميدان العباسية عشان تزور مقام سيدي هاينز
والعجيب والغريب والمريب والرهيب إنهم لما صوروا قبره بالليل لاقوه بينور
والراجل اللى صوره (اللى لحد دلوقتى مش عارفين هو مين) بيحلف انه شافه منور
يا حلاوة
وبعدين لما الامريكان حبوا يشوهوا صورة هاينز مان
عملوا كاتشب بلون الدم سموه "هاينز" في اشارة الى الارهاب والعنف والدموية فى الاسلام
شفتوا المؤامرة اللي ضد الاسلام عاملة ازاى
بعد كده الراجل صاحب فكرة الكاتشب دي لاقوه في شقته ميت محروق، مخنوق، غرقان، مضروب بالنار، مشنوق
بس كوندوليزا رايس مكتمة على الخبر
ودي كانت قصة متولي هاينزمان
الشخصية الاسطورية اللي اخترعها صديقي أسامة عباس
اوعى تكون مش مصدق الاعجاز العلمي الجديد ده ولا حاجة
لو مش مصدق ابعت رسالة لـ"متولي هاينزمان" على الايميل ده
metwally.heinzmann@gmail.com
ده حتى بالأمارة الحاج أحمد حامل مفتاح الكعبة (شخصية أسطورية برضه) شاف "متولي هاينزمان" في المنام
وغير كده فيه واحدة اسمها فاطمة لما كان عندها الحصبة والدكاترة قالوا لها هتموتي يعني هتموتي، شافت "متولي هاينزمان" برضه في المنام
( ماهى طبعا لازم يكون اسمها فاطمة عشان تبقى ماشية مع القصة، يعني هيبقى اسمها فكيهة مثلا؟؟؟ )
وقال لها حال المسلمين مش عاجبني يافاطمة والناس بقيت وحشة اوي اوي
والحل (ومافيش حل غيره) إنك تبعتي الرسالة اللى انا كاتبها لك على حتة القماش دي لكل الناس
( ماهي لازم برضه تبقى قماشة، يعني هيعملها لها على ورقة "ايه فور" مثلا؟؟؟ )
فضلا، مش امرا ولا بالعافية
ما تخليش الرسالة دي تقف عند جهازك
ولا تخليها تقعد عند جهازك
اقول لك ... امسحها من سكات كده
او ابعتها لـ13 شخص عشان "متولى هاينزمان" يجي لك فى المنام وهيقول لك على خبر كويس
واحد ضابط بعت الرسالة دي جت له ترقية في نفس اليوم بعد 13 دقيقة وماحدش عرف موضوع الـ3 اللى كان بيعذبهم يومها
وواحد تاجر اهملها وقعد يتتريق عليها خسر كل ثورته فى 13 دقيقة
واحد في هندسة عين شمس نشرها جاله امتحان الفيلد سهل جدا جدا ولقى نفسه عمال يحل كويس
وواحد زميله فى نفس السكشن اهمل الرسالة جاله امتحان الميكانيكا صعب
واحد تاجر أدوات صحية كبير، استهزأ بيها فاتحشر في التواليت اللي في المحل عنده
وواحد تاجر مخدرات رهيب، فنشرها 1256934 مرة فوروورد فالحمد لله، صفقة الهيروين اللي جاية من ليبيا عدّت على خير
انشرها يمكن تاخد ذنب حلو
او يمكن تكون تلكيكة عشان تاخد ايميل صاحبتك وتبعتها لها
بس خليها
BCC
والا مصر كلها هتعرف ايميل صاحبتك
ويا سلام بقى لو هي ترد عليك بنفس الرسالة
عشان تتطمنوا ان الحب بينكم لسه مستمر مهما كانت الظروف
وبعدين خلى بالك من حاجة مهمة جدا
شركة هوت ميل برعاية "هاينزمان" وشركاه بقالهم 5 سنين بيقولوا ان الشركة خلاص بتفلس والخدمة هتبقى بفلوس بعد كده
الا لو انت بعت رسالة "هاينزمان" دي لـ13 شخص، ساعتها هتفضل الخدمة بالنسبة لك ببلاش
وطبعا مش لازم يقعدوا يحلفوا ان المرة دي هم صادقين، عشان الشعب المصري غلبان وبقاله 5 سنين بيصدق على طول
أنشرها فقط لأن فيها
" لا إله إلا الله "
يعني مش مهم كل الهجص اللي مكتوب ده، المهم تنشرها عشان فيها
" لا إله إلا الله "
وده كان مثال مبسط للجهل اللى احنا عايشين فيه
ربنا يهدينا
ملحوظة: يمكن ناس كتير تبقى مش عارفة أنا باتتريق على ايه بالضبط
بس معلش، اعتبروا المعني في كرش الشاعر
والسلام عليكم
23 comments:
في هذه القصة نحن نسخر من الآتي
1- القصص والروايات والأفلام اللي بتحسسنا إن التنكر ده أسهل حاجة في الدنيا
2- إشاعة تصميم بار على شكل الكعبة للإساءة للإسلام
في حين إنه طلع مجرد معرض لشركة "أبل" مصمم على شكل زجاجي، وكان مغطى بغطاء أسود لحين الانتهاء من تنفيذه
3- الاعتقاد بأن فيه ناس فاضية تقعد تعمل كوكاكولا عشان لما تتعكس تبقى لا محمد لا مكة، وان فيه ناس عاملة كلمة "إله" تحت نعل الجزمة، وإلى آخره من هذه الخرافات
ملحوظة: نحن لسنا نعتقد بوجود مؤامرة ضد الإسلام، لكن مش بالمنظر الأهبل ده
4- ناس تطلع كل شوية تقول لنا اصل البيبسي فيه كحول، والكوكا فيها دهن خنزير، والشيكولاتة صلاحيتها خلصانا ورموها لنا وإلى آخر هذا الكلام اللي بيتقال من غير دليل
5- لعبة: مالك يا سوسن زعلانة ليه، عروستي ضاعت بألف جنيه
:D
تصحيح خطأ في الكتابة
"نحن نتقد بوجود مؤامرة ضد الإسلام، لكن مش بالمنظر الأهبل ده"
جامدة جدا وتناولك للموضوع بالطريقة دى عاطيله مذاق مختلف
بورك قلمك
جزاكِ الله خيرا
أبقى سعيد لو عجبك ونشرتيه
يمكن نقدر نساهم في تغيير فكر الناس
رب اهدِ قومي
لأ بقى
دا حضرتك بتتريق على رجل المستحيل
أنا ما اسمحلكش تشوه صورة بطل
...
بطل مصري
مصري همام...
...
زي أدهم
...
أدهم صبري
+++++
جزاك الله خيرا على مجهوداتك في محاربة الخرافة
ربنا يعينك
:D
معلش ماجتش على عم أدهم
مصر ولادة
راح أدهم
جه متولي
جميل جدا
بجد
:)
ربنا ينصر دينك يا شيخ
أنا باساعدك أهو عشان ما تقولش: إن المسلمين سلبيين
أحاديث موضوعة و ضعيفة و مواضيع باطلة و أخطاء شائعة منتشرة في الإنترنت
http://www.khayma.com/da3wah/latanshr.htm
مواضيع و رسائل خاطئة لا يجوز نشرها منتشرة في المنتديات و عبر الإيميلات
http://www.islam2all.com/dont/dont.htm
جزاك الله خيرا
تمام تمام
جزاك الله خيرا
موقعين مفيدين جدا حقا
أنصحك برضه تبقى تعدي على الموقع ده في طريقك
www.altazkia.com/khorafat
ده الراعي الرسمي لمغامرات عمنا متولي
:D
جزيت خيرا
اسلوب الطرح شيق
تحياتى
ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التالي
http://kawlansadida.blogspot.com/2008/04/blog-post_21.html
وجزاكم الله عن إسلامكم خيراً"
فكرة حلوة وجديدة هما عاوزنا نمسك فى التفهات والرتوش ونترك الحقائق والثوابت
مشاكل المسلمين اكبر من كدة بكتير
* حطم القيود
وإياكم، في انتظار المزيد من التعليقات
تحياتي
* المستنصر بالله
جزاك الله خيرا على تعليقك وفي انتظار المزيد إن شاء الله
* ahmad eddeeb
قلبك وجعك؟ ماهي دي المؤامرة بقى، احذر مني بعد كده
:D
جزاك الله خيرا على تعليقك الظريف
بس الكلام عن دهن الخنزير ده حقيقي
لان في مواد بتكون مكتوبة باكواد معينه بعضها فعلا دهن خنزير
وانا حضرت دورة عن هذا الموضوع
وقعدت امسك المنتجات اللي بشتريها واقارن بين مكوناتها واشوف لو فيها دهن خنزير ولا لا
وطلع معايا منتجات فيها دهن خنزير فعلا يا متولي
ما شاء الله تبارك الله يا بشمهندز
ربنا يبارك لك
اقتراح:متيجي تعملها كتاب
* سارة
إديني فرصة أبحث في الموضوع تاني
لكن على الأقل سخريتي من حاجتين
1- الإشاعات بقى اللي بتطلع على حاجات كتير بلا أصل، وأعتقد الحل فعلا إن الناس تعمل زيك وتشوف بنفسها وتقارن عشان تعرف الحقيقة
2- موضوع إننا نعتبر إن دي مؤامرة ضد الإسلام وإنهم فاضيين بقى قاعدين بحاربونا بإنهم يحشروا الخنزير في أي حاجة عشان يغيظونا وخلاص
لا المؤامرة ليها أبعاد تانية أعمق من كده بكتير
جزاكِ الله خيرا على تعليقك وفي انتظار المزيد
* Anonymous
جزاك الله خيرا على زيارتك لمدونتي وعلى تعليقك
والل الفكرة بتاعتك دي أكيد فكرة جميلة
لكن هل عندك تفاصيل أكتر؟
يعني لو حبيت فعلا أخوض التجربة دي، أعمل ايه؟
ما شاء الله
ده المهندسين عاملين شغل جامد جدا :)
جزا الله خيرا ياباشمهندس على المدونة الرائعة دي
اللي بتظبط العملية في اللاوعي و بتخلي الواحد يعرف إنه غلط من نفسه :) و بأسلوب غير ممل
جزاك الله خيرا
و إن شاء الله أكون زبون مستديم عندك
* sQuEaL !i!
ياباشا جزاك الله خيرا على تعليقك الجميل ده
وده شرف لي إنك تكون زبون في مدونتي المتواضعة
على فكرة، سبحان الله أنا كنت لسه عمال أتصفح مدونة التظبيط بتاعتك، وكانت عاجباني ما شاء الله
خاصة موضوع سلامتها أم حسن، والأغاني، وغص البصر
وفجأة لاقيت الراجل بتاع "التظبيط" منورني في مدونتي
في انتظار المزيد من التعليقات
5- لعبة: مالك يا سوسن زعلانة ليه، عروستي ضاعت بألف جنيه
ههههههههههههههههههههههههه
فين البوست بتاع الانتقام؟ ^_^
معلش أصله انشغل بعد كده في حوار مقاطعة موزمبيق
http://metwallyheinzmann.blogspot.com/2008/05/blog-post.html
في انتظار المزيد من التعليقات
:)
Post a Comment