بعدما غضب متولي غضبا شديدا من المقلب اللي عمله فيه الراجل الملحد
راجع القصة من هنا
كان لازم ياخذ موقف
كان لازم يتصرف
كان لازم يعمل حاجة
أنشأ متولي رسالة طوييييييلة
وقعد يعمل لها فوروورد لكل الناس
الرسالة دي كان فيها تحذير من الملحد
وكان بيقول فيها الاتي
يا جماعة، الحقوا الراجل الملحد اللي ضحك عليا
الحقوا الراجل اللي بيتتريق عليا
وكمان الحقوا خشوا على السايت بتاعه اللي فيه إساءة للإسلام
بصوا، خشوا على السايت ده
لا شوفوا كده لاتكونوا مش واخدين بالكم
المفروض أنشر موقع الكفر بتاعه، مش كده ولا ايه؟
عشان الناس تتعظ
اديها كليكة هنا (أنقر هنا يعني)ـ
بصراحة أنا مش عارف بالضبط الناس مطلوب منها تعمل ايه لما تلاقي السايت بتاعه ده
بس مش مهم
المهم اني انشر السايت بتاعه
وعايزين نلم تصويتات
خش على الموقع ده
أنقر هنا
لما تلاقي السؤال: "هل تتفق مع الراجل الملحد؟؟؟"ـ
قل له "لا"، ابلع الكابسولة . . . عفوا، أقصد أنقر على الكابسولة الحمرا
حتى لو لاقيت كلام بلغة غريبة فمش مهم
المهم تـ كليك على الزرار الأحمر
وعايزين وقفة، لازم وقفة
هنعمل وقفة قدام القهوة اللي كنا قاعدين فيها
عشان لما ضميرنا يأنبنا ويسألنا عملتوا ايه للإسلام، نقول اننا عملنا وقفة قدام القهوة
(بيني وبينكم أنا مش عارف ايه فايدة الوقفة دي، بس قشطة يعني)ـ
ولازم نعمل مظاهرة
ولازم صوتنا يتنبح من كتر الزعيق
ولازم نطلع نكسر أكشاك السجاير (ماحدش يقول لي اشمعنى، أهي أي حاجة نفش غلنا فيها وخلاص)ـ
وهنلبس تي شيرتات عليها صورتي
يا جماعة
صوتكم أمانة
وأنشروا الايميل ده لـ30 واحد عشان آجي لكم في المنام وأقول لكم على خبر كويس
خبر جامد آخر حاجة
خبر جامد التنين
خبر هيفرحكم موت موت موت
ولو بعتها لـ50 واحد، هابعتلك رسالة تانية هدية، عشان تنشرها برضه
(ماهو أكيد الخبر مش هيبقى إني أجيب ساندويتش من عمو حسني هدية)
مع تحيات
رئيس هيئة الافتكاس اللا علمي
حبيبكم وحبيب قلبكم من جوه
متولي هاينزمان
عايز تعرف قصدنا إليه؟
اتفضل هنا
7 comments:
السلام عليكم
في هذه القصة نحن نسخر من الآتي
1- الناس اللي بتثور وتتظاهر لأي سبب من غير ما تعقل الأمور جيدا
2- نشر المواقع المسيئة للإسلام بحجة توعية المسلمين، وده مشكلته البشعة إنه كده بيروج لمواقع الكفار
3- تجميع الأصوات لأتفه الأسباب وبلا فائدة
4- خرافات أنشر تؤجر، وهاينزمان اللي بييجي للناس في المنام
5- الناس اللي كانت بتفكر تلبس تي شيرتات عليها صورة الهرم الأكبر عشان يدخلوه ضمن قامئة المرشحين لعجائب الدنيا السبع الحديثة، ناس فاضية
6- إلحاق الكثير من الأضرار بالمسلمين بسبب المظاهرات اللا واعية
في انتظار تعليقاتكم
الحمد لله علي كل شيء بس للاسفمحدش فاهم حاجه خالص
الفورودجيه بيبعتوا و خلاص بيقرا العنوان و يقرا اخر الايميل
انشرهاتاخد الاجر و تنجح في الامتحان و بابا يجبلك عربيه
يوح باعتو خلاص و فعلا انا اسف مفيش فايده
طب اناابويا ماجابليش عربية لحد دلوقتى ليه؟؟؟
يظهر اني لسه مش فورووردجي تمام
:D
شكرا على التعليق
وفي انتظار المزيد
جزاك الله خير والله انا من زمان نفسي اعمل كده الناس معتقده انها بتعمل خير لكن الحقيقة انها بتبعت خرافات وتروج لخزعبلات
اللى يضحك فى قصة الراجل بتاع المنام دى انى سمعت الشيخ كشك (اسال الله تعالى له الرحمه)تحدث عنها فى احدى خطبه و الشيخ كشك رحمه الله كان يخطب من ايام بتوع الثوره
* Anonymous
جزاك الله خيرا على زيارتك لمدونتي
فعلا موضوع المنام ده الظاهر قديم أوي
ربنا يعافينا
في انتظار المزيد من تعليقاتك
مسخرة :D
Post a Comment